Ekainaren 28an “Euskal Herria markaz eta markagintzaz: nazio garapena, berrikuntza eta parte hartzea oinarri“ izenburuko udako ikastaro berezian parte hartu genuen. Naroa Jauregizuriasoziologoaren ekimenaren ondorioz eta UEUren babesarekin, Nation Branding kontzeptuari buruzko egun osoko jardunaldia Iruñeko Kondestable jauregian ospatu zen.
Marka estrategia garatzen
Bertan erakunde, eragile eta enpresa ezberdinen ordezkaritza anitza batu ginen: Gaindegia behategiko Imanol Esnaola, Aguirre Center-en izenean Juan José Ibarretxe lehendakari ohia, EHUko Koldo Diaz Bizkarguenaga eta Estitxu Garai Artetxe irakasle eta ikerlariak, Labrit Multimedia enpresako Gaizka Aranguren, Puntu Eus Fundazioaren izenean Lorea Arakistain, Laborantza Ganbaratik Iker Elosegi eta Gerediaga elkartearen izenean Izaskun Ellakuriaga, besteak beste.
Egun osoan zehar gure herriaren markari buruzko kontu ugari aipatu ziren, baita munduan zehar nola ikusten gaituzten edo/eta nola ez gaituzten ikusten inguruko gogoeta sakonak eta interesgarriak. Gure agentziaren izenean, Josu Bergara joan zen eta “Euskal markak” kontzeptuari buruzko hitzaldi/gogoeta txikia eskaintzeaz aparte, apunteak hartu zituen. Hona hemen bere kuadernotxoan azpimarratu dituen esaldi aipagarrien zerrenda:
1. “Nazio markagintzan anbizioz eta arduraz jokatu behar dugu”.
2.”Euskal Herria gauza ederrak egiten dakien herri bat da. Ukazioen aurrean gauza ederrak sortzen ikasi dugu”.
3. “Herri txikien garaia da. Small is beautiful, powerful and sexy”.
4.”Atzerrian dauden Euskal Herriko gazteak harrotasun berezi bat sentitzen dute Euskal izaeraz”.
5. “Nation Branding estrategiaren oinarrizko urratsak hauek dira: politika integrala + gizarte akordioa + sinesgarritasuna eta koherentzia + marka ezberdina eta erakargarria”.
6. “Gaur egun imajinario kolektiboa transmititzeko pantailak ezinbestekoak dira”.
7. “Branding estrategiaren osaketan epe luzera lan egin behar dugu. Ezberdinen artean akordioak bilatu behar ditugu.”
8. “Mundu digitalean euskara lehen mailako hizkuntza izatea guztion lana da”.
9. “Produktu edo zerbitzuen salmentan, zenbait kasuan argi dago ‘Euskal’ itxurak saltzen laguntzen duela”.
10. “Markak aldatu egiten dira, zeozer bizia dira eta Euskal Herria markak ere eboluzioa eta adaptazio gaitasuna beharko luke”.
Oraindik goiz da ondorio argi batzuk zehazteko, baina gure ustez egon badaude Euskal Herria Marka eta markagintzaren inguruan lan egiteko prest dauden profesionalak eta adituak. Gure ustez, lan guzti hori modu independientean eta irekian gauzatu beharko litzateke, urratsez urrats eta epe luzera begira, diskurtso argia, eraginkorra eta ezberdina garatuz. Batez ere, mundu global honetan nazio markaren estrategia ondo bideratzea gure etorkizunean faktore klabea izan ahal delako.
Bukatzeko, BURUTU agentziaren lantaldearen izenean eskerrak eman nahi dizkiogu Naroa Jauregizuriari gonbidapenagatik eta UEUko langileei beraien prestutasun eta laguntzagatik. 
