Twitter Blue: Zer da?

Twitter Blue: Zer da?

Twitter Blue ordainpeko harpidetza bat da, Twitter sare sozialak eskaintzen duena. Premium aukera honek funtzio gehigarriak eta plataformaren doako bertsioan eskuragarri ez dauden tresnak eskaintzen dizkie erabiltzaileei.

Twitter Blue herrialde aukeratuetan merkaturatu da, eta, beraz, ez dago eskuragarri mundu osoan. Gainera, Twitterrek adierazi du hobetzen jarraituko duela eta etorkizunean Twitter Blue-ri ezaugarri berriak gehitzen jarraituko duela.

Orduan, zer da zehazki Twitter Blue? Hitz gutxitan esanda, Twitterreko premium bertsio bat da, ezaugarri esklusiboak eskaintzen dituena. Ezaugarri horien artean daude:

Zeintzuk dira bere funtzio gehigarriak?

1. Egiaztapen-marka urdina:

Harpidetza berezi honekin erabiltzaileei egiaztapen-marka urdina eskuratzeko aukera emango zaie. Egia da berrikuspen baten ondoren profil hautagarrietan agertuko dela soilik, harpidetutako kontuek hautagarritasun-irizpide guztiak betetzen dituztela bermatzeko. Twitterrek adieraziko du garrantziagatik edota harpidetzagatik soilik egiaztatu baduten kontua, horrela erabiltzaileek jakingo dute benetan markaren jatorria zein den.

2. Txioen bidalketa desegin:

Funtzio honi esker, erabiltzaileek txio baten bidalketa desegin dezakete behin betiko bidali aurretik. Funtsean, ezaugarri horri esker, erabiltzaileek bidali duten txio bat editatu edo ezabatu dezakete, beste erabiltzaile batzuek ikusi baino lehen.

3. Irakurketa modua:

Irakurtzeko modua erabiltzaileei tweet-hari luzeagoak errazago eta erosoago irakurtzen laguntzen dien tresna da. Ezaugarri honek txioen testua ez den guztia ezabatzen du, eta erraz irakurtzeko formatuan aurkezten du.

4. Gai pertsonalizatuetarako sarbidea:

Twitter Blue-rekin, erabiltzaileek plataformarako gai pertsonalizatuen artean aukera dezakete. Gai horiek hainbat kolore-aukera eta diseinu dituzte, plataformaren itxura pertsonalizatzeko.

5. Bildumetarako sarbidea:

Bildumak tweetak gordetzeko eta talde pertsonalizatuetan antolatzeko modu bat dira. Erabiltzaileek bildumak sor ditzakete eta horiei tweetak gehitu eduki espezifikoaren jarraipena mantentzeko.

6. Buletinetarako harpidetza:

Premium bertsioak bere idazleen, argitalpenen eta beste eduki-sortzaile batzuen buletinetara harpidetzeko aukera ere eskaintzen die erabiltzaileei. Horrela, Twitterreko sarrera-ontzian jaso ditzakete buletinak, eta plataforman irakurri.

7. Lehentasunezko bezeroarentzako arreta:

Ordainpeko harpidetzaduna duten erabiltzaileek lehentasunezko bezeroarentzako arreta ere eskura dezakete, eta horrek esan nahi du haien arazo eta galderei azkarrago eta modu eraginkorragoan erantzungo zaiela.

8. Lehentasuna algoritmoan:

Twitter Blue kontuetako txioek lehentasuna izango dute beste batzuen aldean, eta, ondorioz, errazagoa izango da beste tweet edo bilaketen erantzunetan aurkitzea, gainerakoak baino lehentasun gehiagorekin agertuko baitira. Honek erakusgarritasuna igoko du, txioekin biralizazioa lortzeko aukera gehiago izanez.

9. Publizitate gutxiago:

Horrela da, aplikazioan gainerako ohiko kontuetan baino % 50 iragarki gutxiago daude. Honek erosotasuna bermatu eta plataformaren erabilgarritasuna erraztu egiten du, erabiltzailearen esperientzia hobetuz.

Zein da bere kostua?

Urte beteko plana eskuratuz hilean 7€-ko kuota ordaindu beharko du erabiltzaileak. Aldiz, hilabeteko plana kontratatuz 8€-ko kuota ordainduko du.

Laburbilduz, Twitter Blue aukera interesgarria da funtzio osagarriak eta tresna esklusiboak eskuratu nahi dituzten erabiltzaileentzat. Izan ere, harpidetza hau aukera erakargarria da sare sozialen plataforman esperientzia pertsonalizatuagoa nahi dutenentzat.

Berehalakotasunaren garaia heldu da: Be Real eta Tik Tok Now

Berehalakotasunaren garaia heldu da: Be Real eta Tik Tok Now

Udatik hona Be Real sare soziala bogan jarri da eta indar dezente hartu du Z belaunaldiaren artean.  Sare sozial hau 2020an sortu zen, baina oharkabean igaro da uda honetara arte. Pixkanaka-pixkanaka jende gehiago hasi da sare sozial honetan erregistratzen eta, hau ikusita, TikTok plataforma ez da atzean geratu nahi izan. Sare sozial berri bat abiarazi du, Be Realen oso antzekoa: TikTok Now.

Azken aldian, aurpegiko filtroen erabilera masifikatu egin da. Bizitzaren alderdi ona soilik erakusten dugu, bizi dugun benetako errealitatea albo batera utziz. Horregatik, bi sare berri hauen helburua inolako ukiturik gabe pertsona bakoitzaren egunerokotasuna erakustea da. Hau da, editatu gabeko argazkiak igotzera gonbidatzen gaitu. Beraz, anti postureoko sare soziala dela esan dezakegu.

 

Nola lortzen dute hori?

Oso erraz. Egunean behin bakarrik igo daiteke argitalpena, eta mugikorrak jakinarazpena bidaltzen dizu noiz igo behar duzun abisatzeko. Egunaren arabera ordua aldatzen joaten da.

Abisua heldu eta denbora mugatuan, aurrean duzunari argazkia atera beharko diozu, eta baita selfie erako argazki bat ere. Honen gakoa, aplikazioak jakinarazpena bidaltzen dizun unean argazkia ateratzean datza, ahalik eta “errealena” izateko.

Nahi duzunean igo dezakezu argitalpena, baina jokoaren xarma ahalik eta azkarren igotzea da. Argitalpen guztiak hurrengo jakinarazpena heltzen denean ezabatu egiten dira; hau da, 24 ordu irauten duten argazkiak dira.

Bakoitzak bere edukiekiko kontrol osoa dauka, kontua pribatu jarriz gero onartutako lagunek soilik ikusiko ahal izango dituzte zure argazkiak. Kontuan izan behar da, besteen argazkiak ikusi ahal izateko aldez aurretik bakoitzarena igo behar dela.

 

Zein da Be Real eta TikTok Now-ren arteko desberdintasuna?

Sare sozial bien arteko berdintasunak oso nabariak dira, hala ere, desberdintasun txiki batzuk ere badituzte. Be Real plataformak, momentuz, argazkiak partekatzen bakarrik uzten du, bi minutuko epea emanez. Aldiz, TikTok Now sareak argazkiak eta 10 segundu arteko bideoak partekatzen ere uzten ditu. Eta epeari dagokionez, kasu honetan 3 minutuko tartea ematen dizu.

 

Burutü agentzian beti gustatzen zaigu pil-pilean eta modan dauden joeren berri izatea, bezero bakoitzaren beharretara eta helburuetara egokitutako komunikazio-estrategiak garatzeko.

Podcastak euskaraz

Podcastak euskaraz

Azkenaldian podcasten arrakastak gora egin du eta horrek euskal komunitatean ere bere eragina izan du. Izan ere, geroz eta gehiago dira kanal berri honetara aldatu eta edukia bertan sortzen ari direnak. Marka eta komunikazioa lantzeko tresna bikaina dira podcastak. Baina, zeintzuk dira gaur egun bogan dauden euskal podcastak?

 

Podcastak euskaraz

1. KABALA


“Zikintzeko prest ez bazaude, hau ez da zure podcasta.”

Gazteei zuzendutako podcasta dugu “Kabala”. Gazteek ekoiztua eta gazteei zuzendua: euren gogo, kezka eta arazoak filtrorik gabe eta grazia askorekin partekatzeko gunea, alegia.

2. BERTIKALA

“Zatoz millennialekeriak egitera eta ez izan #horizontala.”

Sara del Río Loiartek eta Laura Re Lozanok aurkezten dute “Bertikala”. Horizontaltasunetik urruntzera eta millenialkeriak egitera animatzen dituzte entzuleak.

3. BARAUA HAUTSIZ

“Dietaren kultura hautsi eta nutrizioaz eta lodifobiaz hitz egiten dugun lagunarteko espazio bat da.”

Elikadura dute aztergai “Baraua Hautsiz” podcastean, beti ere osasun mentalari garrantzi handia ematen diotela. Dietaren kultura haustea dute helburu, eta nutrizioaz eta lodifobiaz aritu ohi dira.

4. GAZTEAK EUSKARAZ

“Gazteen komunikazio-gaitasunaren garapenean lagungarri izatea da material honen helburua.”

Labayru Fundazioak ekoiztutako podcasta da “Gazteak euskaraz”. Gazteen komunikazio-gaitasuna eta euskararen erabilpena sustatzea du helburu. Horretarako, eremu ezberdinetan izan beharreko gaitasunak lantzen dira.

5. MUGAMERS

“Mugamers telefonoetako bideojokoetaz hitzegiteko jaiotzen den euskarazko podcast bat da.”

Angel Sagak eta Star Reamls-ek aurkezten dute “Mugamers”. Gamer munduko gaiak izaten dituzte aztergai.

6. KIROLARI GAITTUN

“Emakumezko kirolariak ardatz dituen podcast saioa.”

Emakume kirolariak dira “Kirolari gaittun” podcastaren protagonistak. Ane Urkirik eta Maddi Garmendiak gidatzen dute saio hau, eta emakumeen kirol arloa eta bestelako gorabeherak izaten dituzte aztergai.

7. BARRUAN GAUDE

“Astero pertsonaia baten etxera sartuko ditugu mikrofonoak.”

Oier Aranzabalek aurkezten du “Barruan gaude” podcasta. Elkarrizketak dira podcasten honen ardatz nagusia. Astero pertsonaia bat gonbidatzen du Oierrek, bere etxera sartu eta berarekin solasean jarduteko.

8. NEW YORKEKO MUNDUA

“Orain berriz hasiko naiz zeregin berarekin, zuek kutxak zabaldu besterik ez duzue egin behar.”

Kirmen Uribek “New Yorkeko mundua” podcastean Euskaldunon egunkarian eta Berrian abiarazitako memoria-kutxeri jarraipena ematen dio.

9. ZAITUN

“Historiaren testigu mutuak direla pentsatuko dute askok, baina haien fruituek, olibek, hizkuntza unibertsala hitz egiten dute.”

Ane Irazabal arrasatearrak aurkezten du “Zaitun” podcasta, non Mediterraneoko txoko desberdinetako kontuak hurbiltzen dizkion entzuleari: Italiako nondik-norako politikoak edo errefuxiatuak, esate baterako.

10. YOKO ONA

“Musikak egin dizkien ekarpenak eta bizi izandako egoera eta pasadizoak, modu atseginean aztertuz.”

Olatz Salvadorrek eta Lore Nekane Billelabeitiak, Ainhoa Vitoriarekin batera, euren musika ibilbide profesionalean bizitako anekdotak izaten dituzte aztergai “Yoko ona” podcastean.

11. BENETAN ZABIZ?

“Gaien aldetik mugarik ez dago eta istorio pertsonaletik abiatuta.”

Aitziber Gradosen eta Malen Altunaren eskutik, “Benetan zabiz?” podcasta. Ez dira gai zehatz batera mugatzen, izan ere, istorio pertsonaletatik abiatuta, gonbidatuen sekretu ilunak plazaratzea dute helburu.

 

 

Marka baten pertsonalitatea: zer da eta nola landu

Marka baten pertsonalitatea: zer da eta nola landu

Marka bat eraikitzen denean, oso garrantzitsua da haren nortasuna zehatz-mehatz ebaluatzea eta definitzea. Baina, zer da marka baten nortasuna? Markari bizia ematen dioten eta haren publikoarekin konexio eta harreman esanguratsuak sortzea errazten duten atributu sinbolikoak dira.

Carl Jung psikiatrak, hainbat azterketa eta analisi egin ostean, 12 arketipo bereizi zituen marka baten pertsonalitatea definitzeko. Carl-en teoriaren arabera, 12 arketipo horiek gizakiaren emozio eta izaera ezberdinak irudikatzen dituzte. Horregatik, enpresaren marka-nortasuna eraikitzeko orduan, garrantzitsua izaten da pertsonalitate ezberdinen kontzeptua argi izatea.

 

Zeintzuk dira Carl Jung-ek definitutako 12 arketipoak?

1. Errugabea:

Garbitasun, sinpletasun eta positibotasun-mezua transmititzea du helburu. Izaera honen beste ezaugarri deigarrietako bat erabakiak hartzerako orduan duen benetakotasuna, bat-batekotasuna eta gardentasuna da.

Scottex marka dugu arketipo honen adibide nagusi.

2. Jakintsua:

Arduratsua da, ikaskuntza eta pentsamendu kritikoa sustatzen ditu; pertsonalitate honentzat garrantzitsua da hurkoari ezagutza eta jakinduria ematea.

Zein marka etortzen zaizu burura deskribapen horrekin? Asko daude, baina Google izan daiteke horietako bat.

3. Esploratzailea:

Abenturazalea eta dibertigarria da, eta munduko lekurik ezkutuenera iristeko gogoa erakusten du, baina errutinarekin nekatzen bada izaera aldakorra izan dezake.

Airbnb markaren komunikazioa pertsonalitate mota honetan oinarritzen da.

4. Errebeldea:

Marka errebeldeak “politikoki zuzenak” diren marken aurka daude. Izenak dioen bezala, arketipo honek nortasun errebelde, ausart eta bizkorra uzten du agerian, egunerokotasuneko arauak hauste aldera.

Desigual horren adibide nagusi.

5. Aztia:

Misteriotsua, ironikoa eta sortzailea da. Izaera hau duten pertsonek berezko trebetasuna dute arazoak aukera bihurtzeko eta gauzak beste ikuspegi batetik ikusteko.

Disney -ren kasuan, kanpaina guztietan entzuleak beraien ametsak errealitate bihurtzera bultzatzen ditu.

6. Heroia:

Bere helburu nagusia mundua aldatzea da; oso langilea da eta edozein erronkari aurre egiteko prest dago.

Entzuleekin konektatu nahi duten markek garaipena eta nagusitasuna transmititzen dute pertsonalitate honekin. Pentsatu Nike markaren komunikazioan; honen kanpainetan etengabe agertzen dira lehiatzeaz harro dauden eta espiritu irabazlea duten pertsonak.

7. Maitalea:

Sentsuala, grinatsua, liluragarria eta erakargarria dira nortasun honen ezaugarri nagusienak. Esklusibotasun kutsua ere izan dezake.

Nortasun honen azpian kokatzen diren markek desirarekin jolasten dute, eta garrantzi handia ematen diote estetikari. Hona hemen pertsonalitate honen marka-adibide bat: : Calvin Klein

8. Bufoia:

Pertsonalitate hau duten pertsonak dibertigarriak eta txantxazaleak izaten dira. Ez zaie axola besteek zer pentsatzen edo esaten duten.

Izaera hau oso ondo egokitzen da aisialdiarekin lotutako produktuak edo zerbitzuak eskaintzen dituzten eta target gazte bati zuzenduta dauden marketara Mixta garagardo markak, ezin hobeto erakusten du pertsonalitate honen esentzia.

9. Herritar arrunta:

Beti besteei laguntzeko prest dagoen pertsona: apala, zintzoa eta beti fidagarria. Arriskuak hartzeko interesik ez duen eta erosotasun eremuan gustura dagoen pertsonari egiten dio erreferentzia.

Ikea izan daiteke pertsonalitate mota honen adibideetako bat.

10. Zaintzailea:

Izenak dioen bezala, arima babeslea da, eta arreta eta maitasuna emateko prest dago beti. Besteei laguntzea du helburu, eta adi egoten da gerta dakizkiokeen gatazka-egoerekin.

Actimel -en kanpaina honek garbi erakusten du izaera honen nondik-norakoak.

11. Sortzailea:

Bitxiak, trebeak eta sortzaileak izaten dira. Horien motibazio nagusia munduan arrasto bat uztea izaten da, beraien lanak hurrengo urteetan zehar gogorarazteko.

Lego markak oso ondo transmititzen du izaera hau kanpaina guztietan.

12. Buruzagia:

Ezin falta taldeko buruzagia. Pertsuasioaren artea menderatzen du, eta ezinezkoa da inor bere erabakiez ez fidatzea; bere buruarengan konfiantza eta bere burua onena bezala nabarmentzeko konpromiso handiegia baitu.

Luxuzko markak izaten dute askotan pertsonalitate mota hau. Prada -ren spot honetan argi ikusten da kontzeptua.

 

Markaren nortasuna garatzeko urratsak

1. Storytelling:

Zeure burua ondo ezagutzea da, zeure burua definitzeko lehen urratsa; horregatik, garrantzitsua da markaren istorioa kontatzea, hasiera-hasieratik hasi eta istorio hori sortzera eraman zuten arrazoietara iritsi arte.

2. Balio-proposamena:

Balio-proposamena kontsumitzaileei egiten zaien promesa bat da, eta horren arabera aukeratuko gaitu kontsumitzaile batek lehiakideen aurrean. Markaren nortasuna garatzea oso garrantzitsua da, lehiatik bereiziko zaituen balio-proposamena eraikitzeko.

3. Xedea eta ikuspegia:

Balio-proposamena kontsumitzaileei egiten zaien promesa bat da, eta horren arabera aukeratuko gaitu kontsumitzaile batek lehiakideen aurrean. Markaren nortasuna garatzea oso garrantzitsua da, lehiatik bereiziko zaituen balio-proposamena eraikitzeko.

Publizitate-Agentzian telelanean aritzearen 5 abantailak

Publizitate-Agentzian telelanean aritzearen 5 abantailak

Burutün bi urte oso daramatzagu online lan egiten, eta publizitate-agentzia batean telelanaren bost abantailak laburbildu nahi ditugu post honetan.

2020ko martxoan salbuespenezko neurri gisa hasi zena, Bilboko gure publizitate-agentziaren ohiko lan-modu bilakatu da.

Gaur egun, bi urte daramatzagu telelanean, eta, nahiz eta noizean behin taldeko dinamika sortzaileak egiteko bulegoan elkartu, gure publizitate-agentzian telelanarekin modu eroso, eraginkor eta arinean lan egitea lortu dugu.

Zeintzuk dira telelanaren abantaila nagusiak publizitate-agentzia batean?

1. Joan-etorri gutxiago, gozatzeko denbora gehiago

Egunero bulegora joan behar izana saihesten dugu, eta, beraz, askoz denbora gehiago irabazten dugu gure bizitza pertsonalerako (familia, lagunak eta aisialdia). Kasu batzuetan urtean 400 ordu baino gehiago aurreztu izan dira etxetik bulegora joateko, eta alderantziz.

2. Egunerokotasunaren kudeaketa hobea

Taldean telelana egitean, proiektu bakoitzari eskainitako denbora optimizatzera bideratutako lan-prozesuen metodologiak aplikatzea erabaki genuen. Proiektu bakoitzaren orduak zehaztasunez definituta, hauek, modu argi eta zehatzean gauzatzea lortu dugu. Aurrez aurreko lanean erabiltzen genuen metodologiari telelanaren sistema aplikatzeak, helburu lorgarriak eta onargarriak markatzen lagundu digu. Proiektuak denbora laburragoan eta aurrez aurre lan egiten genuenean baino emaitza hobeekin amaitzea lortu dugu.

3. Talde estua sortu dugu, “piña” bat gara (birtuala bada ere)

Hasiera batean uste genuen online lan eginez gero, Burutüko pertsonen arteko harremana hoztu egingo zela. Bitxia bada ere, harreman estua eta oso lan-giro ona mantentzea lortu dugu. Horretarako, egunero online bilerak antolatzen ditugu, dinamizatuak eta kanban metodologiaren bidez egituratuak, etengabeko lankidetzan oinarrituz. Elkartasuna, hurbiltasuna eta enpatia dira honaino iristea ahalbidetu diguten gakoetako batzuk.

4. Sormenari sortzen uztea

Egia da oraindik ere badugula espazio komun bat (bulegoa), noizean behin, “brainstorming” edo “ideia-zaparrada” saioen bidez, elkarreragiteko edo aurrez aurreko bilerak egiteko erabiltzen duguna. Baina egiaztatu dugu online lan eginez gero, urrutitik egin ditzakegula taldekako saio sortzaileak. Gainera, proiektu bakoitzaren erronkak eta helburuak banaka prozesatzeko aukera izateak, lasaitasun handiagoa ematen digu.

5. Kaferako etenaldia vs atseden hartzeko benetako etenaldia

Lehen, aurrez aurre lan egiten genuenean, atsedenaldi bat partekatzen genuen bulegoaren ondoan kafe bat hartuz. Gaur egun ez dugu kafea taldean hartzen, bakoitzak bere etxetik egiten baitu lan. Baina atseden hartzeko, erlaxatzeko, paseatzeko edo naturaz gozatzeko aukera dugu. Benetako kit-kat edo atseden-denbora erreala eguneroko lanaldian.

 

Errealitateak zeharo harritu gaitu gure publizitate-agentziarentzat telelana aukera paregabea izan dela ikusaraziz. Pertsonen osasuna eta ongizatea lehenesten dituen lan-filosofia abegitsu eta atsegina bultzatu dugu. Gainera, egunez egun hazten ari gara branding, publizitate, marketin eta komunikazio proiektu berriekin.

Burutün aurrera egiten eta berrasmatzen jarraitzen dugu erronka eta proiektu berriei erantzuteko, etengabe gozatzeko eta ikasteko gai izanik. Henry Forden esaldi ospetsuak dioen bezala “Biharko eguna inoiz ez dela helduko uste dugunean, dagoeneko iragana bihurtu da.”