Euskara sarean: 6 egitasmo aipagarri

Euskara sarean: 6 egitasmo aipagarri

Euskara sarean. Internet jaio zenetik gaur egunera arte, gizakion arteko komunikazioak aldaketa sakonak izan ditu. Gure artean sortzen diren lotura berriek euskarri digitaletan dute oinarria eta, WhatsApp edo Telegram batek antipodetan dugun lagun batekin hitz egiteko aukera ematen digu.

Sortu ditugun lotura arin horiek, beste hizkuntzetako hitzak euskararekin nahastea eragin dute. Miguel Siguan y Solerren hitzetan “Komunikazioa gertatuko bada, solaskide batek, bere lehen hizkuntzaz gainera, bestearen hizkuntzan hitz egiteko gauza izan behar du, edo biek jakin behar dute komunikatzeko balioko dien bigarren hizkuntza bat”.

2015ean Azkue Fundazioak Internet hizkuntza guztietan eskuragarri ez zegoela egiaztatzen zuen eta, geroztik, zenbait euskaltzale lanean ibili dira (eta jarraitzen dute) euskarak sarean duen presentzia areagotzeko helburuarekin.

Beraz, euskarak sarean duen presentzia handitzen hasi dela goraipatu nahi izan dugu eta hemen batu ditugu sarean euskaratik eta euskaraz eginda dauden egitasmo batzuk. Badakigu beste asko daudela eta ez da hautaketa erraza izan baina, sarrera honetan berritzaileak eta ikuspuntu ezberdina eskaintzen dutenak aipatu ditugu.

PUNTU EUS DOMEINUA: EUSKARA SAREAN, BAI!

2012an sortu eta 2014an martxan hasi zen proiektu honek euskara beste hizkuntzen mailan kokatzea bilatzen du, euskararen normalizazioan lagundu nahi du eta euskararen herriari nazioarteko aitortza eskaini nahi dio. Dagoeneko, 10.000 domeinu izenetik gora erregistratu dira, eta egitasmoak beste hainbat ekimen sustatzen ditu: kaixomundua.eus , kodepoesia, labur.eus , tori.eus… etabar.

Gainera, Puntueus Behatokian aurki ditzakegun datuak baikorrak dira: 2017an 16.559 webgunek erabiltzen zuten euskara eta 2018an, ostera, 26.663 webgune ziren euskara erabiltzen zutenak.

EGUNEAN BEHIN: BAKARKA ZEIN TALDEAN, BAINA EUSKARAZ

Benetan harritzekoa iruditzen zaigu, galdera-erantzun formatuko joko honek euskal sarean izan duen arrakasta. Zorionak CodeSyntax ekimen honegatik. Euskara lantzera animatzen gaituzte, sarean eta euskarri digitaletik, egunero 10 galdera txikiei erantzuten diegun bitartean.

Gainera, jokoak lehiaketa jatorra sortzeko aukera ematen digu taldeen bitartez. Nork ez du Egunean Behineko kuadrila taldea? Igande arratsaldeetako WhatsApp elkarrizketen erdigune bihurtu da nork irabazi duen eta zeinek egin dituen tranpa gehiago jakiteak.


Iturria: https://aiaraldea.eus/aiaraldea/1572471771227-egunean-behin-luze-ikasteko-10-galdera

ELEGOSE: EUSKAL LITERATURA SAREAN

Duela urte bete Mastodon egitasmoaz aritu ginen gure blogean. 12 hilabete pasatu dira eta euskarazko komunitatea astinduko zuen sarea aktibo jarraitzen du. Aktibo eta aktibista. Hain da halan, erabiltzaileek irakurketa klub digitala sortu dutela: Elegose.

Talde honen helburua, hilero, euskarazko liburu bat aukeratzea eta irakurtzea da, hilabete amaieran denon artean eztabaidatzen duten bitartean. Euskal literaturari indarra emateaz gain, euskara sarean sustatzeko beste adibide aipagarri bat, zalantza barik.

EUSKAL JAKINTZA: EUSKARA SAREAN, ORDIZIATIK MUNDURA

Ordiziako Jakintza Ikastolako ikasleak eta Maite Goñi Euskal hizkuntza eta Literatura irakaslea batzen dituen proiektu honek, euskara ahalik eta gehien erabiltzea bilatzen du. Horretarako, blog formatua duen orrialdea sortu dute, non euskararen azken berriak batzen dituzten.

Horretaz gain, Gaurko Hitza dinamikarekin, egunero euskarazko hitz berri bat publikatzen dute, Interneteko erabiltzaileek euskararekin topo egin dezaten. Gainera, esaera jatorrak eta aipuak ere lantzen dituzte.

IZPARRINGIA: UMOREA SAREAN, EUSKARAZ

Ultra-komunikazioaren garaian, komunikabide asko aurkituko ditugu sarean zehar. Horien artean, umorea oinarri hartzen duen Izparringia webgunea dugu.

Euskaldunon “El Mundo Today” honek, egunero albiste, berri, bideo zein artikulu dibertigarriak sortzen ditu, errealitatean inspiratuta baina era alternatiboan. Pil-pilean dauden gaiak lantzen dituzte eta kritika, barrea eta burla nahasiz, oso ikuspuntu “interesgarriak” aurkituko ditugu.

PODCASTAK: EUSKARA ETA PODCAST

Duela aste gutxi, podcasten inguruan hitz egin genuen gure blogean. Bertan, adibide orokorrak azaldu genituen eta, gaur, Podcastak egitasmoa aurkezten dizuegu. 2017an sortutako proiektu honek, euskarazko podcast independienteak batzea du helburu.

Audioa kontsumitzeko formatu berri honetan euskararen presentzia baxuaz ohartuta, egoera horri aurre egiteko sortu zuten plataforma hau. Bertan, Argiaren podcastak, Baskonia zainetan, Marruma kulturalak, ZuZeu podcastak, Gramofonoa… bezalakoak aurkituko dituzue.

Asko dira euskararen presentzia sarean indartzen eta lantzen ari diren ekintzaileak. Ausartak zuek, globalizazioak eskaintzen digun etorkizun grisari aurre egiten diozuela. Horregatik, Miguel Siguan y Solerren hitzak berreskuratu nahi ditugu sarrera honi amaiera emateko: “Nola salba liteke hizkuntza hau? Hiztunek beraiek nahi izatea da lehenengo baldintza eta, nortasunaren ikur den aldetik, beren giza taldearen nortasuna eta hizkuntza gorde nahi izatea. Baina gaurko munduan, eta idazketa azaldu zenetik, hizkuntza batek gutxieneko idatzizko erabilera eskatzen du bizirik irauteko.”

 Gure aldetik, beraz, publizitatea euskaraz lantzen jarraituko dugu.

 

Tokiko-markagintza: herri marka garatzen

Tokiko-markagintza: herri marka garatzen

Tokiko-markagintza edo herri marka lantzea lurralde bati izaera ematea da eta hori da, azken finean, markagintzaren helburua. Brandinak markak istorioz betetzen ditu: kontzeptuz, sentimenduz eta mezuz. Hiru atal horiei esker markaren nortasuna zehaztu dezakegu eta izaera horrek ildo koherente bat jarraitzeko aukera emango dio.

City (edo place) branding edo hiri markagintza landu duten zenbait kasu ezagutzen ditugu eta geroz eta udalerri gehiago dira hausnarketa hau egitera animatzen direnak. Burutün kasu batzuk ezagutzen ditugu eta beste zenbait prozesutan parte hartu izan dugu.

Hurrengo lerroetan egin berri diren herri marka garatzeko estrategia ezberdinak laburtu ditugu eta bidean zehar ezagutu ditugun adibide batzuk batu.

Place branding: tokiko-markagintza pausuz pausu.

Marka bat logotipotik harago doan izate bat da. Izan ere, kontsumitzaile batekin lotura emozionala bilatzen du, epe luzera mantenduko den harreman bat sortuz. Herri edo hiriez ari garenean eta hauei izaera bat landu nahi diegunean, ezinbestekoa da errealitatea ikustea, entzutea eta ulertzea. Hausnarketa horretatik sortuko diren ondorioek marraztuko baitute bidea eta bitarte horrek lortuko du etorkizuneko bisitariekin konexio bat sortzea.

Geroz eta gehiago dira eboluzio hori egitera animatzen direnak. Gizarteak izan duen eraldaketak, bidaiatzeko modura ere eragin dio eta, horregatik, herri, hiri zein herrialdeek interesgarria den diskurtso bat eskaini behar dute. Munduko eskaintza guztitik bereiztu behar dute beraien burua, bakarra egiten duten ezaugarriak azpimarratuz eta herritar eta erakunde guztiekin batera, nortasun berezi bat landuz.

Hor dago gakoa: herritar eta erakunde guztiekin batera. Elkarlanean, herritarrengandik herriarentzat.

Herri marka lantzeko printzipioak

Herri, hiri zein herrialde baten marka lantzen dugunean zenbait printzipio edo ideia eduki behar ditugu kontuan. Izan ere, marka berri baten garapenean ematen diren hasierako pausuak garrantzitsuak izango dira etorkizuneko egonkortasun bat posible egiteko.

  1. Berezitasun propioa aurkitu.
  2. Gogoragarria bihurtu.
  3. Elkarlanean osotu.
  4. Etorkizunera begira garatu.
  5. Iraunkortasuna bermatu.
  6. Koherentziatik elikatu.

City branding: adibide batzuk

Oso ohikoa da mundu mailako zenbait tokitan city branding estrategien garapena. Burutün ere, horietako batzuk landu ditugu, adibidez: Urola Garaia. Hona ezagunak izango dituzun beste kasu batzuk:

PORTO

 

HELSINKI

#ALWAYSBARCELONA

 

Euskal herri mailako adibideak

Mundu mailako adibideetatik harago, gertutasunera ekarri ditugun bi adibide batu ditugu ere. Aurten atera diren hiri edo lurralde marka hauek, Euskal Herri mailan “leku markagintzak” toki bat duela argi utzi dute.

ARRAS BAZTAN

Baztango udalak zenbait eragile ezberdinekin batera sortutako marka dugu “Arras Baztan”. Marka honen helburua, lurraldeari nortasuna ematea eta herritarren elkarlana sustatzea da.

Arras Baztan eragile ezberdinen parte-hartzeak eragin zuen barne-hausnarketa batetik jaio zen, herritarren dinamika ekonomiko eta soziala pizteko asmoarekin.

DONOSTIA

 

Edukia eskaintzeaz gain, marka batek maitemindu behar gaitu eta hori da, markagintzan adituak garenon lanik zailena. Tokiko-markagintza estrategia garatu duten toki gehiagorik ezagutzen al duzue?

Orri-markatzaile tipografikoa

Orri-markatzaile tipografikoa

Burutün liburuetan aurkituko ditugun tipografiak modu erraz batean identifikatzeko baliagarria den orri-markatzaile tipografikoa garatu dugu.

Paperezko orri-markatzailean liburu eta aldizkarien publikazioetan erabiltzen diren hogei tipografia erabilienen zerrenda aurkituko duzue: Arial, Baskerville, Bodoni, Caslon, Century Old Style, Garamond, Sabon, Palatino, Sanchez, Georgia, Baskerville Italic, Utopia, Times, Plantin, Athelas, Open Sans, Berling, Times New Roman, Helvetica eta Linux Libertine.

Horretaz gain, markatzaileak trokelatutako eta tamaina ezberdineko hiru lauki ditu. Modu honetan letrak banaka ikusteko aukera izango dugu, bakoitzaren detaile gehiago bereiziz.

Momentuz, orri-markatzailearen 500 ale inprimatu dira. Hauek gure bezero eta hornitzaileek jasoko dituzte. Opari original honi esker, udako irakurketak atseginagoak izango dira.

Tipografiaren garrantzia markagintzan
Marka baten nortasun bisuala garatzen dugunean, tipografia da oinarrizko elementuetariko bat. Branding proiektu baten baitan beharrezkoa da tipografia egoki baten aukeraketa. Honek, marka unibertso koherente, logiko eta ezberdina lantzeko aukera eskainiko digu. Familia tipografiko, talde eta sailkapen asko existitzen dira.

Marka arkitektura: enpresa estrategiaren oinarrian

Marka arkitektura: enpresa estrategiaren oinarrian

Marka arkitektura bezala ezagutzen dugu, marka multzoa modu koherente baten barneratu, bildu eta gidatzen duen ardatz nagusia. Komunikazioan ematen diren sinergia naturalak aprobetxatuz, markagintza estrategia ezberdinak ezartzeko aukera ematen digu baita porfolio handi batek sor ditzakeen gastuak kontrolatzeko abagunea ere.

Marka arkitekturak, orotara, koherentzia eta ordena ematen dio enpresa estrukturari, markak hierarkizatzen baititu eta kontsumitzaileei, informazio argia eta identifikagarria eskaintzen die. Gainera, arkitektura egokia aukeratzeak barne-komunikazioa sinplifikatzen du, berori zuzendutako baliabideak optimizatuz.

Marka arkitektura, pausuz pausu.

Lehenengo pausua

Askotarikoak dira gure enpresan jarri ditzakegun marka arkitekturak. Gure beharrizanetara hobeto moldatzen den eredua aukeratzerako orduan, garrantzitsua da sakon aztertzea zeintzuk diren gure enpresaren eszenatoki eta errealitateak.

Gure marka murgilduta dagoen eremuak ulertzeko, ezinbestekoa da publikoak identifikatuta izatea, produktu eta zerbitzuak ondo ezagutzea eta marka posizionamendua marraztuta egotea. Informazio honi esker, gure marka eta produktuen ezaugarriak zerrendatzeko kapazak izango gara, merkatuaren mapa estrategikoa marraztuz. Gure konpetentziarekin ariketa berdina egitea nahitaezkoa da, modu honetan analisiaren ondorioak zehatzagoak izango direlako.

Bigarren pausua

Azterketa egin ostean, markagintza estrategia idazteko eta marka arkitektura aukeratzeko prest egongo gara. Zeintzuk dira, beraz, aurki genezakeen marka arkitekturak?

Marka arkitektura egokia aukeratzea erabaki estrategiko garrantzitsua da. Ez bakarrik etorkizuneko enpresa-estrategietan eragin zuzena izango duelako, baita ere denboran modu egonkorrean mantendu beharko dugulako. Zalantza barik, marka arkitektura marketing estrategia guztien oinarrian dago eta, horregatik, ezinbestekoa da enpresa profil ezberdinek aukeraketa prozesuan parte hartzea.

Hauek dira, beraz, aurkitu ahal ditugun arkitektura mota:

MONOLITIKOA

Marka arkitektura monolitikoak, produktu eta zerbitzu guztiek identitate berdina dutenean ematen da. Bertan, marka bakar batek enpresa jarduera guztia barneratzen du.

Alde batetik, proposamen honek balio erantsi bakarra eta indartsua eskaintzen du, edozelako promozioak erraztuz eta produktu zein zerbitzu berrien integrazio azkarra bermatuz. Gainera, publizitatean egiten den inbertsioa hobetzen du, ahalegin guztiak marka bakarrean jartzen baitira.

Kontrara, kutsatze arriskua ere badago. Produktu edo zerbitzu maila batek kalterik izatekotan, zerrenda guztiari eragingo baitio.

Hemen adibide bat:

Iturria: http://brandemia.org/la-red-de-transportes-de-pais-vasco-replantea-su-arquitectura-de-marca

ENDORSE EDO MARKA BABESTUA

Arkitektura honek produktu edo zerbitzu maila guztietan presente dagoen marka nagusi bat duen arren, azpi-marka bakoitzak bere estrategia eta izaera propioak garatu  ahal ditu modu independenteago batean.

Endorse-k duen abantailarik nagusiena, “talde” kontzeptuaren garapen egonkorra da non sinesgarritasun eta sostengua ematen den. Marka korporatiboak babesa ematen du produktu edo zerbitzu berri bat merkaturatzean, know-how eta esperientzia ziurtatuz.

Monolitikoan ikusi dugun bezala, modelo honetan ere “kutsatze” arriskua dugu ospe-arazoak izatekotan eta, gainera, mugatze minimo batzuk sortzen dira landutako jarduerak oso ezberdinak badira.

Hemen adibide bat:

Iturria: https://www.uzink.es/tipos-arquitectura-marca/

MULTIMARKA

Izaera anitza duten marka askoren elkarbizitza posible egiten duen marka arkitektura dugu hau. Azpi-marka guztiek modu independentean bizi dira, nortasun eta bide ezberdinak landuz.

Modelo honen helburu nagusiena, merkatu espezifikoetara bideratuta dauden marka indartsu eta autonomoen sorrera da, kasu askotan, markak elkarren arteko konpetentzia izanik.

Sistema honek dituen abantailen artean, hauek azpimarra genezake: marken bereiztea eta merkatu konkretuen espezializazioa posible egiten du. Gainera, komunikazio ahaleginak bakoitzaren balio erantsiak azpimarratzera bideratzen dira, marken jarduera libre bat ahalbidetuz.

Hala ere, publizitatean egin beharreko inbertsioa beste ereduetan baino askoz ere handiagoa dela esatea beharrezkoa da.

Hemen adibide bat:

Grupo Riberebro Marka Arkitektura

Iturria: http://chil.me/spains-food-manufacturers/grupo-riberebro

MISTOA EDO HIBRIDOA

Eredu hau da, seguru asko, guztietan konplexuena. Izenak ondo adierazten duenez, marka arkitektura hau, aurretik aipatu ditugun modelo bi edo gehiagoren arteko gurutzaketa batetik sortzen da.

Egoera hau, gehienbat, enpresen arteko fusio edo erosketetatik ematen da eta ildo estrategikoa zehazterako orduan arazoak ematen ditu. Gainera, aurreko modeloan aipatu bezala, publizitatean egin beharreko inbertsioa ere oso handia da.

Alde positibo bat aipatu behar bagenu, marka berriak merkaturatzeko ematen dituen erraztasunak izango litzateke. Batez ere, marken arteko koherentzia estrategiko zein grafiko sakonik existitzen ez delako.

Hemen adibide bat:

Eroski Marka Arkitektura

Iturria: http://marcaporhombro.com/dia-supermercado/

Edozein proiektutan zimenduak modu egokian finkatzea ezinbestekoa da. Oinarri egonkor batek, denboran zehar agertuko diren zailtasunak gainditzeko babesa emango baitigu eta marka arkitektura on batek, estrategia orokorra eta helburuak idazteko baliabideak emango dizkigu.

Beraz, ordenatu, sinplifikatu, enfokatu eta jaurti.